Cristiano Ronaldo, dan kwallon Juventus
FC Porto ta yi waje da Juventus a gasar Champions League, duk da rashin nasara da ta yi da ci 3-2 a Italiya a wasan da suka yi ranar Talata.
Kungiyoyin sun buga wasa na biyu a gasar cin kofin zakarun Turai don fayyace wadda za ta kai fafatawar quarter final.
Kungiyar ta Portugal ta ci wasan farko da suka yi a cikin Fabrairu da ci 2-1, yayin da Juventus ta ci 3-2, jumulla Porto ta kai zagayen gaba ne, bayan da ta ci kwallo biyu a Italiya.
Wannan ne karon farko da Porto ta kai Quarter finals a Champions League, bayan da ta ci wasan farko, tun bayan 2003-04 da ta yi nasara a kan Lyon.
A karo na biyar kenan ana cire Juventus a wasan zuwa daf da na kusa da na karshe a Champions League idan aka doke ta fafatawar farko.
Wanda Juventus ta yi bajinta a biyar din shi ne karawa da Atletico Madrid, inda tasha kashi da ci 2-0 a Spaniya, yayin da ta kai quarter finals a Italiya, bayan da ta ci 3-0 a 2018-19.
