Yan wasan Barcelona a cikin murna
Barcelona ta yi nasarar doke Villareal 1-0 a wasan mako na 21 a gasar La Liga ranar Lahadi.
A minti na 18 da fara tamaula Pedri ya ci kwallon da ya bai wa Barca maki ukun da take buga a karshen makon.
Wasa na shida a jere a La Liga da Barcelona ta lashe mai kofin babbar gasar tamaula ta Sifaniya 26 jimilla.
Kwallo bakwai ne kadai ya shiga ragar Barcelona a La Liga a bana, kuma wasan da aka doke a baya shine wanda Real Madrid ta ci 3-1 cikin Disambar 2022.
Sai dai Barca ta doke Real 3-1 a Janairun 2023 ta lashe Spanish Super Cup da suka fafata a Saudi Arabia.
Barcelona ta ci gaba da zama ta daya a kan teburin La Liga mai maki 56, Real Madrid mai kwantan wasa tana ta biyu ta hada maki 45.
A ranar Asabar Real ta lashe Fifa World Club Cup a Morocco, bayan cin Al Hilal 5-3 a wasan karshe.
Real ta kai fafatawar karshe bayan cin Al Ahly ranar Laraba, ita kuwa Al Hilal doke Flamengo ta yi ranar Talata.
Ranar Laraba Real Madrid za ta karbi bakuncin Elche a Santiago Bernabeu a wasan mako na 21, idan ta yi nasara za ta rage tazarar maki zuwa takwas kenan.
Ranar Alhamis Barcelona za ta karbi bakuncin Manchester United, domin buga wasan neman gurbin shiga 'yan 16 a Europa League.
