Bellingham da Colwill ba za su buga wa Ingila wasa ba

Jude Bellingham da Levi Colwill ba za su buga wa Ingila wasan neman shiga Euro 2024 da za ta kara da Malta da Arewacin Macedonia ba.

Bellingham dan wasan Real Madrid da Colwill dan kwallon Chelsea, suna jinya.

Yanzu 'yan wasa biyar ke nan daga tawagar Ingila da suka hakura da buga mata wasan da za ta yi ranar 17 da kuma 20 ga watan Nuwamba, sakamakon jinya da suke yi.

A ranar Litinin Ingila ta gayyaci Cole Palmer da Ezri Konsa da Rico Lewis, wadanda suka maye gurbin James Maddison da Callum Wilson da kuma Lewis Dunk.

Sai daga baya dan wasan Manchester United, Marcus Rashford da na Manchester City, Kalvin Phillips za su je cikin tawagar, bayan wasu dalillai na kashin kai da suka sanya ba su je sansanin da wuri ba.

Tuni Ingila ta samu gurbin buga gasar nahiyar Turai, Euro 2024, wadda Jamus za ta karbi bakuncin cikin watan Yuni zuwa Yuli.

Ingila na fatan ci gaba da jan ragamar rukuni na uku a wasanni na neman shiga gasar Euro 2024.