Despacito star join list of odas wey leave successful careers to devote dia life to God

Puerto Rican star Daddy Yankee wey sing Despacito don tok say im dey leave music to carry im cross follow Jesus.

Di star wey bin also drop di song Gasolina reveal dis informate for im last show for im La Última Vuelta (Last Lap) world tour.

Di 46-year-old rapper bin reveal say, "living a successful life no be di same tin as to live life wey get purpose. For long, I don try to fill di empitness wey nobody fit fill.

"Na why tonight I recognise say I no dey shame to tell di world say Jesus dey live in me and I go live for am."

Dis na ogbonge about turn for one of di ogbonge voices for reggaeton, di sexuallly charged, street- smart style wey show for Panama and Puerto Rico for di 1990s, wey mix reggae music with Latin America dancehall music and hip-hop.

Daddy Yankee wey im family name am Ramón Luis Ayala Rodríguez na one of di biggest stars from dis kain music.

E drop im first solo record for 1995 and don go on to collabo with pipo like Justin Bieber, Snoop Dogg, Janet Jackson and di Jonas Brothers.

E bin announce say e go bow out for March as im drop im first album in ten years wey im call Legendaddy and di promise say im go do im biggest show.

As im finish im last show for San Juam, di star thank fans, for dia support as im tell dem say "follow Jesus Christ wey be di way, di truth and di life", as drones fly ova di stadium form cross for air.

E no go be di only one for di raggaeton community wey go drop music for religion, even last year, Puerto Rican rapper Farruko tell fans sorry for Miami for di bad language wey full im songs as im follow dem tok about religion.

But no be only reggae music. See oda stars wey leave behind successful career to devote dia life to God.

1. Chidinma

Chidinma blow for 2010 wen she win Project Fame West Africa.

Afta her win from di reality show, she release her first song with Late Sound Sultan wey dem call 'Jankoliko'.

She go on to release oda bangers like 'Kedike', and 'Emi Ni Baller'. She don collabo with plenti stars with her most popular pairing with Flavour Nwabania.

She win di 2014 Headies for best video and get nomination for Best Female Act for di 2014 MTV Africa Music Awards.

But for May 2021, she announce why she dey leave secular music to turn gospel singer. She say she wan leave fame now and wan work for her papa.

2. Pastor Chris Okotie

Chris Okotie now dey known as di Senior Pastor of di Household of God Church for Lagos, Nigeria.

But for di 1980s, e bin blow as ogbonge pop artist wey release gbedu like, 'Carolina' 'I need Someone', 'All my love', 'Fine Mama' and 'Show me Your Backside'.

But im leave all dat wen e announce say e don give im life to Jesus Christ and become a born again Christian.

E later go bible school for America and come back to found di Household of God Church.

Dis days as pastor of di Household of God church, e dey write and minister only Christian songs mostly for im church and to im congregation.

Some of di songs like 'Yonder Place', don manage to make am out of im church to become popular outside even though e no promote am.

Pastor Chris don also venture into politics. For 2003, e start a political campaign to become president of Nigeria but e no win.

3. Little Richard

Rockstar Little Richard bin go from doing orgies and sniffing cocaine to become pastor den to go back to di world.

Im first ogbonge hit song na Tutti Frutti for 1955. E later release oda song like Slippin' and Slidin' and Good Golly Miss Molly.

But for 1957, im announce for show say e dey quit rock and roll and become travelling evangelist before im drop di album, King Of The Gospel Singers for 1961.

But just one year later, e go back to rock and roll.

For 2019, e say, "even though I dey sing rock and roll, God still love me. I be rock 'n' roll singer but I still be Christian."

4. Ma$e

Rapper Ma$e wey dey popularly know as Puff Daddy boy-boy bin follow sing inside songs like Can't Nobody Hold Me Down, Mo' Money, Mo' Problems and Mariah Carey Honey.

For 1997, im first album, Harlem World bin dey top charts but wen im second album no gree blow, im tell New York DJ Funkmaster Flex for interview say e don find God and dey comot rap so im no go "lead pipo, friends, and pikin dem to di road to hell".

E don change back to di name dem born am with wey be Mason Durell Betha and be pastor wey get church for Atlanta.

5. Al Green

Al Green bin dey popular for soul songs like Let's Stay Together and Tired Of Being Alone but e reveal say im get im religious calling for Disneyland afta im finish im performance, wey make am dey shout "Halleluyah" for hotel room.

But e bin still dey reason di mata until im babe vex pour boiling food for im bodi and shoot herself.

Na for 1976, Green open di Full Gospel Tabernacle church for Memphis wia im dey preach till today.