Di fresh 26 count charges wey land Emefiele for EFCC custody

Former govnor of di Central Bank of Nigeria Godwin Emefiele don plead not guilty to 21 out of di 26 wey di Economic and Financial Crimes Commission (EFCC) charge am for.

EFCC charge Emefiele go court ova case of abuse of office and allocation of billions of US dollars.

Di anti-corruption agency drag di former govnor of di Central Bank of Nigeria (CBN) go court ova alleged abuse of office and allocation of US dollars.

Emefiele show face for court on Monday afta EFCC drag am ova 26-count charges. Im appear bifor Justice Rahman Oshodi of di Ikeja High court.

Emefiele dey arraigned wit Henry Omole wey be anoda suspect.

E dey face charges wey include say im abuse office for Lagos between 2022 and 2023.

According to di EFCC prosecutor wey file di charges, Rotimi Oyedepo, SAN, Emefiele bin allocate 'foreign exchange wey reach di sum of $2.1 billion without bids and e dey against di rights of Nigerians'.

Afta pleading not guilty, di judge adjourn di case go 13 April.