Eden Hazard ya yi ritaya daga buga wa Belgium tamaula

Eden Hazard ya yi ritaya daga buga wa tawagar Belgium tamaula yana da shekara 31, bayan da aka fitar da kasar daga Gasar Kofin Duniya a Qatar.

Hazard ya fara yi wa kasar tamaula yana da shekara 17 da haihuwa a 2008, wanda ya yi karawa 126 da cin kwallo 33.

Dan wasan yana cikin tawagar Belgium da ta kai daf da karshe a Gasar Kofin Duniya a 2018, inda Faransa ta doke ta 1-0.

Sai dai Belgium ita ce ta uku a wasannin, bayan da ta yi nasara a kan Ingila.

Hazard ya fara buga wa Belgium wasa a karawa da Luxembourg, wanda ya shiga canji - a lokacin shi ne matashi na takwas da ya yi wa kasar tamaula.

Daga nan ya buga wasa uku a Gasar Kofin Duniya da karawa biyu a Gasar nahiyar Turai - wanda ya yi wa kasar kyaftin sau 56.

Hazard ya buga wasannin Gasar Kofin Duniya uku a Qatar, inda Belgium ta ci Canada 1-0, sannan ta tashi 0-0 da Croatia, sannan Morocco ta doke ta 2-0.

Tsohon dan wasan Chelsea ya koma Real Madrid kan £150m a 2019.

Ya yi kaka bakwai a Stamford Bridge da cin Premier biyu da FA Cup da League Cup da kuma Europa League.