Fitattun ƴan takarar gwamna a jihar Neja

Jihar Neja wadda ke yankin arewa ta tsakiyar Najeriya, na cikin jerin jihohin ƙasar da za a yi zaɓen gwamna da na 'yan majaisar dokokin jahohi ranar 18 ga watan Maris.

Abubakar Sani Bello shi ne gwamnan jihar na yanzu wanda zai kammala wa'adin mulkinsa na biyu.

Jihar ta Neja tana da manyan mutane da dama waɗanda suka riƙe manyan mukamai a Najeriya da suka hada da tsofaffin shugabannin ƙasa biyu na mulkin soja, wato Ibrahim Badamasi Babangida mai ritaya da kuma Abdusalami Abubakar mai ritaya.

Akwai 'yan takarar 15 da ke fafatawa a zaɓen gwamnan jihar na ranar Asabar, sai dai ana ganin zaɓen zai fi zafi ne tsakanin jam'iyyar APC mai mulkin jihar da PDP da NNPP, da LP da kuma APGA masu hamayya.

Umar Muhammad Bago - APC

Umar Mohammed Bago shi ne mutumin da jam'iyyar APC mai mulkin jihar Neja ta tsayar a matsayin ɗan takararta.

Ya fito ne daga ƙaramar hukumar Bida a shiyya ta ɗaya da aka fi sani da Zone A, kuma a halin yanzu, shi ne ɗan majalisar wakilai ta tarayya da ke wakiltar mazaɓar Chanchaga, kuma karo uku kenan a jere yana wakiltar yankin a majalisar.

Umar Bago ya yi takarar neman kujerar kakakin majalisar wakilai a majalisa ta 9 tare da kakakin majalisar Femi Gbajabiamila.

Isah Liman Kantigi - PDP

Isah Liman Kantigi ɗan takarar gwamnan Neja na jam'iyyar PDP.

Ya fito ne daga ƙaramar hukumar Edati a shiyyar Zone A.

Kantigi ya taɓa riƙe muƙamin shugaban ƙaramar hukumar Edati, sannan tsohon kwamishinan ƙananan hukumomi ne a zamanin mulkin tsohon gwamna Mu'azu Babangida Aliyu.

Yahaya Sokodeke - NNPP

Yayaha Sokodeke shi ne mutumin da ke yi wa jam'iyyar NNPP takarar gwamnan jihar Neja.

Babban ɗan kasuwa ne, kuma ɗan asalin ƙaramar hukumar Bida wacce ta taɓa zama babban birnin jihar.

Jushua Bawa - LP

Joshua Bawa shi ne wanda ke yi wa jam'iyyar Labour takara.

Dan asalin yankin Magama ne na shiyyar Zone C.

Ya kasance tsohon shugaban ma'aikatan fadar gwamnatin jihar Neja a zamanin mulkin tsohon gwamna Babangida Aliyu.

Khadija Iya Abdullahi - APGA

Khadija Iya Abdullahi ita ce 'yar takara mace ɗaya tilo da ke neman gwamnan jihar Neja wacce jam'iyyar APGA ta tsayar.

Ta fito ne daga ƙaramar hukumar Bida.

Khadija Iya lauya ce kuma 'yar kasuwa.

Ragowar 'yan takarar sun hada da:

Salaudden Abdulazeez Oyeniyi na jam’iyyar - A

Idris Muhammad na jam’iyyar - AA

Dauda Yahaya Danbaba na jam’iyyar - ADC

Abdulmalik Sa’idu na jam’iyyar - ADP

Muhammad Aliyu na jam’iyyar - APM

Isa Muhammad Bello ba jam’iyyar - APM

Abubakar Ibrahim na jam’iyar - NRM

Abdulkadir Lawu Bahari na jam’iyyar - PRP

Yarima Muktar Yakubu na jam’iyyar - SDP

Aliyu Umar Larat na jam’iyyar - YPP