Klopp na fatan a soke jan katin da aka bai wa Mac Allister

Kociyan Liverpool, Jurgen Klopp ya ce yana sa ran za a soke jan katin da aka bai wa Alexis Mac Allister a wasan Premier League da Bournemouth ranar Asabar.

Mai shekara 24 dan kasar Argentina, wanda ya koma Anfield daga Brighton a bana kan fam miliyan 58, an kore shi daga karawar da Liverpool ta ci 3-1.

Za a dakatar da Mac Allister wasa uku, bayan da ya taka kafar Ryan Christie daga nan aka ba shi jan katin.

Bournemouth ta fara cin kwallo ta hannun Antoine Semenyo a minti uku da take leda.

Liverpool ta farke ta hannun Luis Diaz a minti na 27, sai Mohammed Salah ya kara na biyu, bayan da ya barar da bugun fenariti tun farko.

Kungiyar Anfield tana da ci 2-1, sannan aka kori Mac Allister daga fafatawar.

Diogo Jota ne ya ci na uku da ya bai wa Liverpool damar hada maki ukun da take bukata a fafatawar mako na biyu a Premier League