Late US actor Hackman children names no dey inside im $80m will

Dem don release di will of ogbonge Hollywood actor Gene Hackman, but tins no clear ova im $80m (£62m) fortune.

Di two-time Academy Award winner leave im entire estate to im wife of 30 years, Betsy Arakawa. But Arakawa, 65, die alongside her husband for dia home for New Mexico last month.

Legal experts say, becos authorities say Arakawa die seven days bifor her husband, Hackman children now fit potentially inherit im fortune, even though im no put dia names for di will.

Im three children wit im late ex-wife, Faye Maltese - Christopher, 65, Elizabeth, 62, and Leslie, 58 - neva comment publicly on top dis mata.

Warning: Dis story get tins inside wey fit upset some readers.

Legal documents wey BBC see show Hackman, 95, name Arakawa as im sole beneficiary for 1995, di last update to di will na for 2005.

However, California attorney Tre Lovell bin tell BBC say di estate fit default to dem under succession laws, as long say no oda beneficiary name dey.

"Di estate go dey probated in accordance wit intestate succession laws and di children go lawfully be di next in line to inherit," im tok.

Dem go also need to prove say di will dey invalid becos Arakawa die bifor Hackman, im add.

Authorities say Arakawa die on 11 February afta she catch one rare virus, days bifor Hackman die of natural causes.

Dem find di couple dead for separate rooms for dia $4m Santa Fe home on 26 February afta neighbourhood security bin conduct a welfare check, na dia dem see dia body for ground through one window.

Dem find Arakawa for bathroom wit pills scattered nearby, while Hackman bin dey for di back of di house, im bin dey wear sweatpants and slippers, im cane and sunglasses bin dey beside am.

Officials say im die seven days afta im wife due to severe heart disease, dem list advanced Alzheimer as a contributing factor.

Authorities initially bin say di scene bin dey "suspicious" but later dem rule out foul play.

Arakawa own will leave her assets to Hackman, wit a provision say if dem die within 90 days of each oda, her estate go, go trust and later dem go donate am to charity afta dem cover medical expenses.

Hackman in di past bin discuss im relationship wit im children.

"You go become very selfish as an actor," im tell Di New York Times for1989. "Even though I get family, I bin dey take jobs wet go separate us for three or four months at a time. Di temptations for dat, na dI money and recognition, im bin dey too much for di poor boy in me."

Hackman children, wey really no dey di public eye, occasionally bin dey attend red carpet events wit am.

For anoda interview, Hackman tok about di difficulty im children get of growing up wit a parent wey bin dey constantly for di spotlight.

"E dey tough to be son or daughter of a celebrity," im tell di Irish Independent for 2000. "I bin no always dey for house wit dem wen dem bin dey grow up, and den, to live for California, my success bin always dey hang ova dia heads."

Im daughters and granddaughter express deep affection for am afta im die.

"Im bin dey loved and admired by millions around di world for im brilliant acting career, but to us, im just be Dad and Grandpa," dem tok. "We go miss am well-well, dem add say dem dey devastated by di loss."



Gene Hackman and Betsy Arakawa marry for more dan 30 years.