Letexier ne zai yi raflin wasan Real da Chelsea a Champions

An bayyana Francois Letexier a matakin wadda zai busa wasan Real Madrid da Chelsea ranar Laraba a Santiago Bernabeu.

Real za ta fafata da Chelsea a wasan farko a zagayen quarter finals a gasar zakarun Turai ta Champions League.

Wannan shine karon farko da raflin dan kasar Faransa zai yi alkalancin fafatawar Real Madrid.

Wasa na biyu da zai busa wa Chelsea, bayan wanda kungiyar Stamford Bridge ta ci Dinamo Zagreb 2-1 ranar 2 ga watan Nuwambar 2022.

An haifi Letexier ranar 24 ga watan Afirilun 1989, wanda ke alkalanci a gasar Ligue 1 ta Faransa.

Ya zama raflin Fifa a 2017, yana daga cikin fitattun alkalan Turai dake taka rawar gani kawo yanzu.

Shine ya yi rafli a karawar da Napoli ta je ta ci Ajax 6-1 ranar 4 ga watan Oktoban 2022 a gasar zakarun Turai ta bana.

Haka kuma shine ya busa wasan da Borussia Dortmunta ta doke Copenhagen 3-0 a Champions League ranar 6 ga watan Satumbar 2022.