Man United za ta yanke makomar Greenwood kan fara kakar bana

Manchester United za ta sanar da makomar Mason Greenwood a Old Trfford kan fara kakar tamaula ta 2023/24.

United za ta fara wasan farko a Premier League da fafatawa da Wolverhampton ranar 14 ga watan Agusta.

Ranar 2 ga watan Fabrairu an soke zarge-zargen da ake yi wa Greenwood, ciki har da laifin fyade

Masu shigar da kara sun ce shaidu sun janye bayar da shaida, sannan an samu haske kan lamarin zargin da ake yi masa da ta kai aka soke su.

Sai dai United ta sanar da cewar ta fara nata binciken dan kwallon kan laifin da aka zarge shi.

Tun daga lokacin da aka fara zargin Greenword, bai sake buga wa United tamaula ba, kuma yana da kwantiragin da zai kare a Old Trafford a karshen Yunin 2025.

Ten Hag ya sanar cewar ya bayar da shawarar da ya kamata a dauka kan dan wasan, amma ya kara da cewar kungiya ce za ta yanke hukunci na karshe.

Wasu na cewar United ta yanke hukunci kan makomar dan kwallon, wadda za ta sanar da hukuncin da ta dauka kafin ta kara da Wolverhampton.