Najeriya ta amince da yi wa 'yan ƙasar riga-kafin maleriya

Hukumar kula da ingancin abinci da magunguna ta amince a fara yi wa 'yan ƙasar allurar riga-kafin zazzaɓin cizon sauro mai suna R21.

Wata sanarwa da hukumar ta fitar ta ce an sanar da ministan lafiya da hukumar bunƙasa lafiya a matakin farko game da wannan mataki na amincewa da riga-kafin don ɗaukar matakan da suka dace na yin allurar ga jama'a

NAFDAC ta kuma buƙaci faɗaɗa gwaje-gwajen da ake yi ta yadda matakan za su ƙunshi nazarin illar da allurar ka iya yi a Najeriya.

Ta ce za a yi amfani da riga-kafin ne wajen hana kamuwa da zazzaɓin maleriya ga ƙananan yara 'yan wata biyar zuwa 'yan shekara uku da haihuwa.

Sanarwar ta NAFDAC ta ce ana samun zazzaɓin cizon sauro a duk faɗin Najeriya, kuma kashi 97% na al'ummar ƙasar ne ke cikin hatsarin kamuwa da maleriya.

A cewar rahoton zazzaɓin cizon sauro na duniya na 2021, Najeriya ce ta fi yawan masu kamuwa da cutar maleriya. Kashi 27% na masu kamuwa da zazzaɓin cizon sauro a duniya, ana samun su ne a Najeriya.

Kuma ƙasar ce ta fi yawan mutanen da suka mutu sanadin zazzaɓin maleriya a 2020.