South Africa police pursue killers of popular DJ Warras afta fatal shooting

Police for South Africa dey chook eye into di fatal killing of one popular DJ, DJ Warras wey en real name be Warrick Stock.

According to SABC news, Gauteng police tok-tok pesin ask for information from di public to assist dia investigation.

E no dey clear wetin be di motive for di shooting wey happun for Johannesburg central business district but police say three attackers "bin ambush am wey dem open fire afta he park his car. Di suspects now run away on foot."

Gauteng Police tok-tok pesin Tinstwalo Sibeko add say "we no arrest anybody yet but we dey investigate dis case. Any pesin wey get information fit contact di police," SABC quote.

DJ Warras sister tok say di incident "dey traumatic but make pipo give us privacy to mourn. E leave behind beautiful children, we need positivity right now."

We sabi say DJ Warras speak about many tins and controversial topics – make we focus on wetin he stand for"

She confam say dem bin shoot her brother at di Carlton centre for Johannesburg.

Sources say DJ Warras don secure five protection orders bifor his murder. Dis protection orders be against pipo wey dey occupy di Zambezi building for di central business district.

E dey alleged say di 40-year-old DJ bin receive death threats bifor his murder on Tuesday.

• Join di BBC News Pidgin WhatsApp channel
• Trump ban Burkina Faso, impose partial ban on Nigeria and oda kontris
• Five of di greatest players wey neva win Afcon bifor

Warras family statement

Family of di late DJ and media personality release statement Wednesday morning wia dem express dia shock about di murder of dia relative.

"Di senseless nature of his death don leave di family devastated and broken.

Di Stock family say "Warrick leave behind three young children, im mama and siblings wey all dey affected by his death."

Dem add say DJ Warras bifor his death be "respected South African media pesin, businessman and activist wey influence many wit im kindness beyond his home and across di entire entertainment community."

Di family add say dem go release details about his memorial and oda funeral arrangements later.

South Africa minister for Sports & Culture react

Di minister of Sports, Arts and Culture oga Gayton McKenzie wey vex about di murder.

"He be pesin wey love dis kontri wey he also bin tok his truth without fear or favour."

Oga Gayton McKenzie add say "he even criticize me as minister and some of my decisions as minister."

"During di recent G-20 summit, we hire DJ Warras to perform for di foreign visitors, ministers and guests from oda kontris," di minister tok inside one interview wit local network eNCAnews.

Di late DJ wey also dey involved for property management wey he bin dey run one security company wey dey help wit building evictions.

Di sports minister also explain say he vex sake of DJ Warras be against hijacking of buildings.

"Illegal foreigners enta dis kontri and hijack buildings; and now dem kill one of our own. I dey wait for di police minister to tok us who kill am. But I fit bet my last money say ibi di illegal foreigners wey hijack our buildings wey don kill am," oga Gayton McKenzie tok.

• Police arrest Hollywood director Rob Reiner son for murder after im parents death
• Legendary Ghanaian musician Daddy Lumba make im final journey home despite drama ova who be im 'legal wife' and oda controversies
• Bollywood star actor Dharmendra die at di age of 89