Watakila Rashford ba zai buga wasan Granada ba saboda jin rauni
Watakila Marcus Rashford ba zai buga wa Manchester United wasa na biyu na Europa League a karawar quarter final da Granada ranar Alhamis ba.
Mai shekara 23, shi ne ya fara ci wa United a wasan da kungiyar Old Trafford ta yi nasara da ci 2-0 a Spaniya, daga baya aka sauya shi a fafatawar.
Dan wasan tawagar Ingila ya yi minti 72 a gasar Premier League da United ta doke Tottenham 3-1 ranar Lahadi, amma bai halarci atisaye ranar Laraban nan ba.
United ta sanar cewar ''Danil James ya murmure, duk da bai yi wasan Tottenham ba, sakamakon jinya, sai dai Rashford bai yi atisaye ranar Laraba ba, da kyar ne idan zai yi karawa da Granada.
'Yan kwallon United da suke hukuncin katin gargadi da suka karba a Spaniya da suka hada da Kyaftin Harry Maguire da Scott McTominay da kuma Luke Shaw ba za su yi fafatawar ba.
Anthony Martial da kuma Phil Jones na yin jinya, shima Eric Bailly ba zai buga Europa League ranar Alhamis ba, bayan da ya koma United daga Ivory Coast, wanda ya taba kamuwa da cutar korona.
