Wetin to know about UK crackdown on illegal workers as police arrest 600 pipo for January alone

Authorities for United Kingdom don arrest hundreds of migrants for January as part of dia UK-wide crackdown on illegal working, di goment tok.

Enforcement team raid 828 premises including nail bars, car washes, and restaurants and arrest 609 - a 73% increase on di January data.

Home Office Minister Dame Angela Eagle tell BBC say di decision to release fotos of di arrest na to send message about di realities of working illegally and she defend di goment approach as "compassionate".

Later on Monday, MPs go debate di goment immigration bill. Shadow Home Secretary Chris Philp don tok say na "weak bill wey go stop di boats".

Vape shops for Cheshire and grocery warehouse for south London dey among di places wia dem raid.

Di pipo wey dem arrest make di journey to UK through a mix of routes, including by crossing di Channel and by overstaying visas wey dem bin grant dem legally.

Despite say dem don win di election seven months ago, senior Labour strategists don already dey worried about losing voters, dem dey concern about di immigration reform for dis coming election.

Party figures believe say describing di arrest and deportation no dey enough – reason why dem decide to release footage of dem arrest illegal immigrants today, so pipo go fit see am wit dia own eyes.

But odas dey in di Labour Party wey dey fear say focusing on illegal immigration only increase di noise about di issue.

Some Labour MPs, particularly on di left of di party, believe say di goment go do more to establish safe and legal routes for pipo make dem come to di UK and tok about di benefits of immigration.

Speaking to BBC Radio 4 Today programme, Dame Angela ask if releasing footage of di raid align wit Sir Keir Starmer past pledge to create immigration system "basedon compassion and dignity".

"I no believe for one minute say enforcing di law and ensuring say pipo wey break di law face di consequences of doing dat, up to and including deportation, arrest, no dey compassionate," she tok.

She add say e dey "e dey important to show wetin we dey do and e dey important say we send messages to pipo wey dem don tell lies about wetin go await dem in di UK if dem smuggle dem".

Di goment also intend to reduce di number of hotels housing asylum seekers, Dame Angela tok.

Dame Angela follow BBC Breakfast tok on Monday, she tok say dem get plans to close nine of di 218 hotels wey dem dey use by di end of March.

From di start of di Labour goment for July up to 31 January, dem don arrest 3,930 for ova 5,424 visits by immigration enforcement officers, di Home Office tok.

Dem also issue a total of 1,090 civil penalty notices, wit employers wey dey face fine of up to £60,000 per worker if dem dey guilty.

During di same period, di Home Office tok say four of di "biggest return flights in di UK history" return more dan 800 pipo.

But Reform UK leader Nigel Farage describe di new figures released by di goment as weak, compared wit di numbers wey don enta di kontri.

Across di 31 days of January, about 1,098 pipo arrive for di UK illegally on small boats.

Di goment say dem launch social media campaign for Vietnam in December and Albania in January, wey go discourage pipo from going to UK illegally.

Di adverts highlight stories from migrants wey enta di UK illegally "only to face debt, exploitation and life far from wetin dem promise dem", di Home Office tok.

Dame Angela say dem introduce dis campaign to counter "sophisticated ads" wey pipo smugglers place online, dem dey "tell lies about di situation for Britain, about how easy e dey to get jobs".

Pipo wey come UK illegally dey "more likely to dey live for small apartments, wey dey exploited by gangs", she tok.

Later, di goment Border Security, Asylum and Immigration Bill go debate di House of Commons for dia second reading.

Di bill aim to introduce new offences and counter terrorism-style powers to clamp down on pipo smugglers wey dey bring migrants into di kontri.

Di Conservatives say dem don put forward amendment to di immigration bill in a bid to include dia own immigration proposals: to double how long e take for migrants to get indefinite leave to remain and, afta dat, require dem make dem wait five years rather dan one bifor dem fit apply for citizenship.

Philp add say "effective removals dey needed" to stop small boat crossings, something e tok say Labour don scrap, in reference to di former goment plan to send illegal migrants to Rwanda.