Who be di lawmaker wey gunmen shoot dead inside 'targeted' attack for Nairobi

Gunmen on top motorcycle don shoot one Kenyan member of parliament dead for di streets of di capital Nairobi, for wetin authorities suspect as assassination.

Police tok say di attackers bin dey follow Charles Ong'ondo Were im motor bifor one of dem drop from di motorbike and shoot am for close range.

"Di nature of dis crime be like say e dey targeted and predetermined," police tok-tok pesin Muchiri Nyaga tok for statement.

Di MP wey dey opposition party bin complain about threats to im life two months ago, local media report.

Afta di shooting on late Wednesday, im driver and bodyguard, wey no dey hurt, manage to rush di injured MP go Nairobi Hospital, wia e dey pronounced dead on arrival.

Di attack happun along Ngong Road near one busy roundabout wey traffic police officers dey always dey and di place dey well secured wit security cameras.

Shortly afta di shooting, senior police commanders and detectives visit di scene and investigations dey underway, police tok.

President William Ruto don order police to conduct thorough investigation into di attack, e add say: "Dem must hold those responsible wey dey responsible to account."

Fellow legislators wey visit di scene express shock and outrage at di killing and call for swift investigations and justice.

Parliament Speaker Moses Wetang'ula describe di MP as a "fearless and distinguished" legislator, e call di shooting "devastating".

Were bin represent Kasipul constituency for western Kenya as member of di Orange Democratic Movement, wey veteran politician Raila Odinga dey lead.

For im statement, Odinga condemn di killing, e say assassin gun down di legislator "mercilessly and for inside cold blood".

"We don lost one gallant son of di soil!" Odinga add.

Odinga lost to President Ruto for di 2022 election and e reject di results sake of alleged irregularities.

Di former prime minister don since struck one political deal wit Ruto wey see some opposition members join cabinet for wetin dey referred as di "broad-based government".

Who be Charles Ong'ondo Were?

Charles Ong'ondo Were na Kenyan politician wey dey elected as di Member of Parliament (MP) for Kasipul Constituency for Homa Bay County for 2017.

Im political career start for 2017 wen dem elect am as di MP for Kasipul constituency.

During im time for Parliament, e bin serve for di Departmental Committee on Blue Economy and Irrigation.

Bifor e become politician, Oga Were bin work for di corporate sector.

According to the Parliament website, Were get certificate, diploma, bachelor's degree, and master's degree between 2011 and 2019.