Yadda aka yi jirgin zuwa ƙasan teku ya fashe

Hukumomin Amurka sun ce tarkacen da aka samu a wani wuri da ke can ƙasan Tekun Arewacin Atalantika sun nuna cewa jirgin ruwan OceanGate na Titan mai tafiya a ƙarƙashin teku ya gamu da "mummunan bala'i".

Duk fasinjoji guda biyar da ke cikin jirgin a take suka mutu.

Rundunar sojin ruwan Amurka ta ce ta ji wata ƙara da ta yi "daidai da fashewar abin" jim kaɗan bayan ɓatan jirgin a ranar Lahadin da ta wuce, yayin da ya buga nutso zuwa ƙasan teku inda karikicen jirgin ruwan Titanic yake mai nisan mita 3,800 (12,467).

A ƙarshe, an tabbatar da asarar jirgin bayan an gudanar da wani gagarumin aikin bincike a kusa da tsibirin Newfoundland na ƙasar Kanada.

Me yake faruwa idan an samu ruftawar jirgi?

Wannan lamarin na nufin cewa jirgin ƙarƙashin tekun na Titan ya rufta ba zato ba tsammani, mai yiwuwa saboda tsananin ƙarfin ruwa a ƙarƙashin teku wanda ya matse jirgin daga waje, in ji wakilin BBC na kimiyya, Pallab Ghosh.

An yi imanin cewa Titan ya kai nisan mita 3,500 a ƙasan teku lokacin da ya ɓata a ranar Lahadin da ta wuce.

Ana tunanin jirgin ya fashe ne, ya rufta ciki sakamakon tsananin ƙarfin ruwa, wanda zai iya yin daidai da nauyin hasumiyar Eiffel ta ƙasar Faransa, ko kuma tan 10,000, in ji Pallab Ghosh.

Idan aka samu ruftawar wani sashen jirgin ciki, ƙarfin ruwan da ke waje zai rinjayi ƙarfin da ke cikin sunduƙin, abin da zai iya kwalmaɗa jirgin.

An ƙera jirgin ne ta yadda zai iya jurewa irin wannan ƙarfin ruwa - kuma ƙwararru a yanzu za su yi ƙoƙarin tantance abin da taƙamaimai ya faru har aka fashewar jirgin. Bin ƙwaƙƙwafin tarkacen jirgin da aka gano, na iya taimakawa wajen tabbatar da haka.

Idan gundarin jikin jirgin ƙarƙashin teku ya fashe, ya kan rufta ciki da saurin misalin tafiyar kilomita 2,414 a cikin sa'a ɗaya - wato saurin mita 671 a cikin daƙiƙa, in ji Dave Corley, wani tsoron jami'in jirgin ƙarƙashin teku mai dakon makaman nukiliyar Amurka.

Lokacin da yake ɗauka ya gama fashewa gaba ɗaya bai fi misalin milisakan ɗaya, wato ɗaya cikin dubu na daƙiƙa.

Ƙwaƙwalwar ɗan'adam tana mayar da martani ga faruwar wani abu a cikin misalin milisakan 25 wato 25 cikin dubu na daƙiƙa ɗaya, Mista Corley ya ce. Martanin da ɗan'adam zai iya mayarwa cikin hankali ga faruwar abu - daga fahimta zuwa aikatawa - an yi imani mafi zafin nama shi ne millisakan 150 a cikin daƙiƙa.

Iskar da take cikin sunduƙi ana da haɗakar tururin haidiro-kabon (hydrocarbon) mai yawa.

Idan jirgin ya fashe, iskar tana ƙyasta kanta da kanta sannan kuma sai a smau tarwatsewa bayan ruftawar farko da aka samu cikin sauri, a cewar Mista Corley.

Gangar jikin mutum takan rididdige kuma ta zama toka, ta bi ƙura nan take.

Mene ne zai iya haifar da ruftawar jirgin Titan?

Tsohon matukin jirgin rundunar sosjojin ruwa na Burtaniya Ryan Ramsay ya shaida wa kamfanin dillancin labarai na PA cewa ɗaya daga cikin abubuwa guda biyu, na iya faruwa.

Mai yiwuwa wata ƙofa mai makullai 17 da aka yi amfani da ita wajen rufe fasinjoji a ciki ce ta samu matsala, lamarin da ka iya haifar da fashewar jirgin "saboda ruwan cikin tekun yana da ƙarfi, ko da ba a yi tafiya mai nisa ba".

Wani abin kuma shi ne, a samu matsala da jikin jirgin shi kansa, wadda ke iya haifar da sakamako irin wanda aka gani, in ji shi.

"Irin wannan lamari na iya faruwa cikin sauri, don haka ba lallai ne fasinjojin jirgin ma. su san abin da ya faru ba," in ji shi.