Yan wasan Barcelona a cikin murna
Getafe za ta kara da Barcelona a wasan mako na 29 a gasar La Liga ranar Lahadi a filin wasa na Coliseum Alfonso Perez.
Barcelona ta ci Getafe 1-0 ranar 22 ga watan Janairu a wasan farko a kakar bana a La Liga, inda Pedri ya ci mata kwallon saura minti 10 su je hutun rabin lokaci.
Barcelona tana matakin farko da maki 72 a teburin babbar gasar tamaula ta Sifaniya, Real Madrid ce ta biyu mai maki 62.
Ranar Asabar Real Madrid ta je ta doke Cadiz 2-0 a wasan mako na 29 da suka kece raini a La Liga.
Wadanda suka ci wa Real kwallayen sun hada da Nacho Fernandez da kuma Marco Asensio.
Getafe mai maki 30 bayan wasa 28 tana ta 16 a kasan teburin La Liga na kakar nan.
'Yan wasan Barca sun hada da Ter Stegen, R. Araujo, Sergio, Lewandowski, Ansu Fati, Ferran, Iñaki Peña, Marcos A da kuma Jordi Alba
Sauran sun hada da Kessie, S. Roberto, Raphinha, Kounde, Eric, Balde, Gavi, Pablo Torre, Arnau Tenas, A. Alarcón da kuma Aleix Garrido
